Bariga Ghouta: Ciidammada Suuriya oo geyiga u kala qeybiyay saddex

Ciidammada Suuriya ayaa guulo ka gaaray dadaallada ay ugu jiraan qabsashada Bariga Ghouta ee ay mucaaradku haystaan, sida ay wararku sheegayaan.

Ciidammada ayaa xannibay magaalada ugu weyn gobolka, ee Douma, iyagoo mid kalena go`doomiyay, sida laga soo xigtay hay`adda arrimaha bani`aannimada ee Suuriya ee fadhigeedu yahay Britain (SOHR).

Dowladda Suuriya ayaa bishii la soo dhaafay bilowday dagaal ballaaran oo ay dib ugu qabsaneyso Bariga Ghouta, oo u dhow caasimadda Dimishiq.

Tan iyo markaas waxaa lagu soo warramayaa inay dib u hanteen kala bar gobolka, waxaana loo maleynayaa inay dagaalkaasi ku dhinteen in ka badan 900 oo rayid ah.

Qaramada Midoobay ayaa weerarradaasi ku tilmaantay “kuwo aan la aqbali karin”, iyadoo sheegtay inay waxyeello ba`an ka soo gaarto rayidka.

Milatariga dalkaasi ayaa lagu eedeeyay inay beegsadaan shacabka, balse waxay ku andacoonayaan inay isku dayayaan xoreynta gobolka – oo ka mid ah goobaha ugu dambeeya ee ay mucaaradku ku xooggan yihiin.

Hannaanka dagaal ee dowladda Suuriya ee Bariga Ghouta ayaa ah inay gobolka kala qaybiso ayna jarto taageerada mucaaradku ay helaan, Tifaftiraha BBC ee Arrimaha Carabta Sebastian Usher ayaa sheegaya in haatan dowladdu ay u muuqato mid ku guuleysatay hadafkaasi.

Dowladda Suuriya ayaa la sheegayaa inay qabsatay magaalada bartamaha ku taalla ee Misraba, ayna ku sii socoto dhul-beereedyada ku hareereysan.

Misraba waxay ku dherersan tahay waddo weyn oo xiriirisa Douma, dhanka waqooyi, iyo magaalada kale ee weyn, Harasta, dhanka galbeed.

Haddii la xaqiijiyo, qorshaha ayaa geyiga u kala qaybin doona saddex – Douma iyo magaalooyinka dhanka waqooyiga kaga hareereysan, galbeedka Harasta, iyo inta ka soo hartay geyiga ee koofurta.

Bishii January, Turkiga ayaa bilaabay dagaal uu maleeshiyada Kurdiyiinta kaga saarayo gobolka Afrin ee waqooyiga Suuriya ku yaalla, una dhow xadka Turkiga.

Ciidammada Turkiga, oo kaashanaya qaar ka mid ah isbahaysiga mucaaradka maleeshiyaadka Suuriya ayaa haatan ku sugan duleedka magaalada Afrin

Leave a Reply

Your email address will not be published. Required fields are marked *

scroll to top